تازہ ترین

اسلام آباد دا چار نمبر مخولیا

Afzal Raaz

کانگاں……افضل راز

 

کندھاں نال لمکیاں جے قد اُچیرا ہوندا تے سانوں ہر بندہ چمچڑکاں وانگوں چھتاں نال ٹنگیا لبھنا سی۔

پر انج ہویا کدے نئیں۔ بندیاں دی ایس بُھکھ نوں اسی کیہ ناں دے سکنے آں۔ سیانے آکھدے نیں پینڈا ٹُر کے ای وڈھیا جاندا اے۔ پر کیہ کریئے عقلاں دے انھے رات دی کالخ مٹن توں پہلاں پہلاں سورج نوں ہتھ لا لینا چاہندے نیں۔ ایہناں نوں ایہہ پتہ نئیں منزل تیک اپّڑن واتے سفر بوہت ضروری اے۔ پر اسی تے سفر کرنا ای نئیں چاہندے۔ جہڑے کم وچ اوکڑاں نئیں ہوندیاں اوہ رُکّھا رہندا اے۔ اسی کم تے کرنا نئیں چاہندے مشہور ہونا چاہنے آں۔ تے ایس مشہوری دی چس نے بندے نوں کسے پاسے دا نئیں چھڈیا۔ بندہ محنت چھڈ بیٹھا اے۔ نقلاں مارنا اوہنے اپنی ذات دا حصہ بنا لیا اے۔ ایس طراں دا اک مخولیا جنہے انسانی قدراں نوں پیراں ہیٹھا ںدے کے پیسے تے کما لئے پر اوہ اجے تیکر بندہ نئیں بن سکیا۔ انسان ہونا تے وڈی گل اے۔ ایہدے کماں نوں ویکھدیاں ہویاں لاہور دے اک وڈے افسانہ نگار شاعر نے اسلام آباد دے کسے اخبار دے سوال دا جواب دیندیاں آکھیا جہڑا اسلام آباد دے چار نمبر مخولیئے بارے سی۔ شاعری ایس دے وس دا روگ نئیں ایہنوں کجھ ہور کم کرلینا چاہی دا اے۔ پرایہنوں ایس بڈھے افسانہ نگار شاعر دی دتی مت پسند ناں آئی تے ایہنے پہلے نالوں ودھ کے گند گھولنا شروع کر دتا۔ اک دوست نے کسے مشاعرے لئی ایہنوں دعوت دینا چاہی تے ایہہ مخولیا ایہنوں کہن لگا ہن میرا ریٹ چھ ہزار ہو چکیا اے جے ایہہ بھار چُک سکنا ایں تے میں آجانا واں۔ پر دوست نے اگوں جواب دتا۔ میں مشاعرے دی دعوت دے رہیا واں مجرے دی نئیں۔ ایہہ لوکی جدوں ملکوں باہر جاندے نیں تے ایہناں دیاں سگویاں نسریاں بھکھاں جاگ پیندیاں نیں۔ جس کم وچ کالے کرتوت کھل کھلا کے سامنے آجان تے او س کم وچوں برکت اُٹھ جاندی اے۔ ہن ادب وی ایہناں کالیاں ہتھوں مردا جارہیا اے۔ ایس چار نمبر مخولیئے نوں تے ایہہ وی پتہ نئیں مزاح تے مخول وچ فرق کیہ ہوندا اے۔ سُنیا اے اج کل ایہہ استاد بنن دے چکراں وچ اے تے استادوی اوہناں دا جہڑے ڈاکٹر اکھوانا چاہندے نیں۔ ڈاکٹر بننا نئیںچاہندے۔ اللہ معاف کرے ایہو جہے استاد ہوون تے فیر شاگرداں دا اللہ ای حافظ ہووے گا۔ ایہناں لوکاں دے دفتراں وچ جان دا اتفاق ہووے تے تہانوں پتہ لگے جے اوتھے ایہہ لوک اپنے ذاتی کماں وچ رُجھے ہوندے نیں۔ جس کم دی تنکھاہ لیندے نیں اوہ کم نئیں ہو رہیا ہوندا۔ ایہناں دیاں اوہناں رقماں نوں تُسی حلال تے نئیں آکھ سکدے۔ جہڑے حرام کھاندے ہوون اوہناں دیاں لکھتاں وچ کِنج حلالی چس آوے دی۔ ایہہ لوکی مراثی بن کے ہساندے نیں ایہناں دے کلام وچ ہسان دی طاقت نئیں۔ کسے پُن چھان کرن والے بندے نے اسلام آباد دے اک مخولیئے بارے لکھیا سی جے ایس دی شاعری وچوں ایس مخولیئے نوں کڈھ دیئے تے باقی کُجھ وی نئیں بچدا۔ ایہہ گل سولاں آنے ٹھیک اے۔ چار نمبر مخولیئے نے اک واری برطانیہ توں آئے اک شاعر دے گھر سجی محفل وچ کسے دوست نوں ویکھ کے زنانیاں وانگوں سیاپا کرنا شروع کر دتا۔ کہن لگا ایس بندے نے میرے روزگار دا بھٹھا بٹھا دتا اے۔ ایہہ لوکاں نوں کہندا پھردا اے ایہنوں باہر ناں بلاؤ ایہنوں تے کسے خطرناک بیماری نے گھیریا ہویا اے۔ جدوں اوہدے دوست کولوں پچھیا گیا تے اوہنے آکھیا ایس مخولیئے نے خوددسیا سی ،میں اج اوس خطرناک بیماری دا ٹیسٹ کرا رہیا واں۔تے میں ایسے گل نوں ساہمنے رکھدیاں گل کیتی سی۔ بعد وچ پتہ کیہ لگا کسے نے ایس مخولیئے نوں نسوار وچ مرچاں ملا کے کھوا دتیاں سن۔ ایس مخولیئے نے اردو نال وی چار ہتھ کیتے نیں۔ ہن پتہ لگا اے پشتو وچ وی اوہدی کتاب آرہی اے۔ اسلام آباد دے اک کھوجکار نے دسیا جے ایس چار نمبر مخولیئے نے اپنا کلام گائون لئی وڈے وڈے گلوکاراں نال رابطے وی کیتے دوستاں کولوں وی مدد لئی پر ہر واری گلوکاراں دا جواب ایہہ ہوندا سی ایہہ کلام اسی نئیں گا سکدے جے تسی ایہنوں اپنی واز وچ گاؤ تے تُسی لتا دی مت مار سکدے او۔ فیر ایہنے اک پروفیسر گلوکار دا ترلہ کیتا اوہنے وی ایس مخولیئے نوں ٹکا کے جواب دتا۔ جو میں گانا چاہنا واں اوہ تسی لکھ نئیں سکدے۔ اک کتاب امریکہ توں چھپ رہی اے جس دا سانوں اچیچ نال انتظار اے۔ اوہدے وچ وی ایس مخولیئے دے امریکہ وچ کیتے کماں دا ذکر موجود اے۔ ایس مخولیئے نوں ہتھ وکھان دا بڑا شوق اے۔ ہرویلے اوہدی جیبھ تے اکو گل ہوندی اے ؟ باہر جاواں گا کیہ لیاواں گا۔
٭٭٭

نئی تبصرہ شامل کریں

About text formats

متعلقہ خبریں

مسیحا نوں کم کرن دیو ۔۔ ۔۔ ۔۔ لکھت: ڈاکٹر صغرا صدف

ایس کائنات وچ بہوں وڈے تے نیک لوک موجود نیں جیہڑے حیاتی نوں کسے خاص مقصد لئی دان کر کے لوکائی دی فلاح وچ رُجھے رہندے نیں۔ ایہناں نال ای حیاتی دیاں

فروری 05, 2018

اَن پڑھتا دی وڈی وجہ غربت تے مہنگی تعلیم

لیکھ: صبا زہرا

جمدیاں ای گڈیاں دے شیشے صاف کرن والے بال اہم شہری کیویں بنن گے…؟؟؟

جولائی 04, 2018

ملکی ترقی دی ضامن سوچ

عبدالباسط

ملک نوں ترقی دی شآہراہ اتے چلان‘ اقتصادی تے معاشی سرگرمیاں نوں فروغ دین تے عوام دے مسئلے تے مشکلاں حل کرن لئی ملکی اداریاں دے س

اپریل 09, 2018

کیہ میرے "جانوں" چور نیں؟

تحریر: جاوید ملک

مئی 12, 2018

*رمضان تے قرآن دی مناسبت*

*رمضان تے قرآن دی مناسبت*
مفتی عمران (لیکچرار)

جون 02, 2018